కర్ణాటక మంత్రి డి. సుధాకర్ కన్నుమూత

కర్ణాటక  ప్రణాళిక, గణాంకాల శాఖ మంత్రి డి. సుధాకర్ (66) కన్నుమూశారు. గత నెల రోజులుగా అనారోగ్యంతో బెంగళూరులోని కిమ్స్ ఆస్పత్రిలో చికిత్స పొందుతున్న ఆయన  ఆదివారం తెల్లవారుజామున 3:15 గంటలకు తుదిశ్వాస విడిచినట్లు ఆస్పత్రి వర్గాలు అధికారికంగా ప్రకటించాయి.

సుధాకర్ కొద్దికాలం క్రితం మోకాలి శస్త్రచికిత్స కోసం మణిపాల్ ఆస్పత్రిలో చేరారు. సర్జరీ అనంతరం ఆయన ఊపిరితిత్తుల్లో ఇన్ఫెక్షన్ సోకింది. దీంతో పరిస్థితి విషమించడంతో మెరుగైన చికిత్స కోసం ఏప్రిల్ 20న ఆయనను కిమ్స్ ఆస్పత్రికి తరలించారు. అప్పటి నుంచి ఆయన లైఫ్ సపోర్ట్‌పై చికిత్స పొందుతున్నారు. ఊపిరితిత్తుల మార్పిడికి కూడా వైద్యులు సన్నాహాలు చేస్తున్న క్రమంలోనే ఆయన మరణించడం విషాదకరం.

చిత్రదుర్గ జిల్లా ఇన్‌చార్జ్ మంత్రిగా కూడా బాధ్యతలు నిర్వర్తిస్తున్న సుధాకర్, డిప్యూటీ సీఎం డీకే శివకుమార్‌ను తన రాజకీయ గురువుగా భావించేవారు. వారిద్దరి మధ్య సన్నిహిత సంబంధాలు ఉన్నాయి. మొత్తం నాలుగుసార్లు ఎమ్మెల్యేగా గెలిచిన సుధాకర్ 2008లో స్వతంత్ర అభ్యర్థిగా గెలిచి బీజేపీ ప్రభుత్వంలో మంత్రిగా కూడా పనిచేశారు. అనంతరం కాంగ్రెస్‌లో చేరి హిరియూరు నియోజకవర్గం నుంచి 2013, 2023లలో విజయం సాధించారు. ఆయనకు భార్య, కుమారుడు, కుమార్తె ఉన్నారు.

మంత్రి సుధాకర్ మృతి పట్ల డిప్యూటీ సీఎం డీకే శివకుమార్ తీవ్ర దిగ్భ్రాంతి వ్యక్తం చేశారు. తన సన్నిహితుడు, మంత్రివర్గ సహచరుడు సుధాకర్ మరణం తనను తీవ్రంగా కలచివేసిందని అన్నారు. ఆయన ఆత్మకు శాంతి చేకూరాలని, వారి కుటుంబ సభ్యులకు భగవంతుడు మనోధైర్యాన్ని ఇవ్వాలని ప్రార్థించారు. కర్ణాటక ప్రతిపక్ష నేత ఆర్. అశోక కూడా సుధాకర్ మృతికి సంతాపం తెలిపారు.